Ліберальна-дэмакратычная партыя Беларусі (ЛДПБ) у канцы кастрычніка 2022 года падрыхтавала зварот у Міжнародны крымінальны суд (МКС) у дачыненні да Польшчы. У ім партыя Алега Гайдукевіча запатрабавала прыцягнуць да крымінальнай адказнасці прэзідэнта, прэм’ер-міністра і міністра абароны Польшчы «за падрыхтоўку акту агрэсіі ў дачыненні да Беларусі». У партыі расказалі, што адказалі ў МКС.
Адказ МКС датаваны 31 студзеня 2023 года і прыйшоў за подпісам начальніка аддзела інфармацыі і доказаў канцылярыі пракурора Міжнароднага крымінальнага суда Марка Дылана.
«Міжнародны крымінальны суд кіруецца Рымскім статутам, які надзяляе яго вельмі канкрэтнай і дакладна акрэсленай юрысдыкцыяй і мандатам. А асноўная асаблівасць Рымскага статута заключаецца ў тым, што суд можа ажыццяўляць юрысдыкцыю ў дачыненні да асоб толькі ў выпадку найбольш цяжкіх злачынстваў, якія выклікаюць занепакоенасць міжнароднай супольнасці ў цэлым. А менавіта — генацыд, злачынствы супраць чалавечнасці і ваенныя злачынствы. На падставе наяўнай у цяперашні час інфармацыі паводзіны, апісаныя ў вашым паведамленні, праўдападобна, не падпадаюць пад гэтае строгае вызначэнне. Адпаведна, паколькі абвінавачанні, як уяўляецца, выходзяць за рамкі юрысдыкцыі суда, пракурор пацвердзіў, што ў цяперашні час няма падставаў праводзіць далейшы аналіз», — падкрэсліў начальнік аддзела канцылярыі пракурора Міжнароднага крымінальнага суда.
Як заявіў старшыня ЛДПБ Алег Гайдукевіч, «гэты адказ нікога не здзівіў».
«У сваім звароце мы адзначылі канкрэтныя факты падрыхтоўкі баевікоў на тэрыторыі шэрагу краін, у тым ліку Польшчы, для ўзброенага ўварвання, дыверсій і тэрарызму на тэрыторыі Беларусі. Факты відавочныя, яны былі адзначаныя ў нашым звароце», — расказаў ён.
На яго думку, гэта сведчыць пра «двайныя стандарты» і дыскрэдытацыю міжнароднага права.
«Выснова: Беларусь мае права абараняць сябе так, як мы лічым, згодна з законам. З тэрарыстамі размовы не будзе», — падсумаваў Гайдукевіч.
Зварот у МУС ад імені ЛДПБ быў адпраўлены 28 кастрычніка мінулага года. У ім заяўлялася, што «беларускі бок цягам некалькіх месяцаў выдатна бачыць і адкрыта публікуе інфармацыю пра фарміраванне на тэрыторыі Польшчы ўзброеных груп», якія пераследуюць у тым ліку мэты «ўсталявання кантролю над суседняй дзяржавай і змены беларускага канстытуцыйнага ладу шляхам ужывання ўзброенай сілы». У звароце таксама адзначалася, што «дакладна вядома пра размяшчэнне цэнтраў баявой падрыхтоўкі на тэрыторыі Польшчы, дзе працуюць не толькі польскія, але і амерыканскія вайсковыя інструктары, а таксама спецыялісты іншых краін Паўночнаатлантычнага альянсу NATO». У ЛДПБ палічылі, што гэта «акт агрэсіі» з боку Польшчы.